THURIN
Thurin I: Pathian Lehkhabu Thianghlim (Holy Bible)
Pathian thu, Thuthlung Hlui leh Thuthlung Thar, atir bera ziaka awm hmasa kha Pathian thawkkhum thianghlim, thuneihna nei leh dik lo thei lo leh nun kawng dika kaihruaitu a ni.
Thurin II: Pathian leh Thlarau Thianghlim
Pathian (YAHWEH) chu engkim siamtu, thuneitu ber, hmuh theih loh Pathian, engkim ti thei, thlarau leh thutaka chibai buk tur a ni.
Yeshua, Pathian Fapa mal hrin chhun, thlarau thianghlimin nula thianghlim Mari a paitir leh a laka piang a ni. Amah chu Hriakthih (Heb.Messiach) min rawn tlantu leh Chhandamtu ni fawma Pathian mi tirh a ni.
Thlarau Thianghlim chu Thlamuantu dang, Yeshua Messian a aiawha ‘pek’ leh ‘tirh’ a tiam tawh kha a ni. Mi (Person) ni lovin, Pa leh Fapa atanga thiltihtheihna nung pek chhuaha awm a ni.
Thurin III: Suala mihring tlukna
Mihring chu Pathian anpui, sualna nei lova siam a ni a; mahse, thlemna tawkin ama duh thu ngeiin Pathian thupek a bawhchhia a, thiam loh changin chatuan nunna a hloh ta a ni.
Thurin IV: Chhandamna
Mihring thiam loh chang tawh chu Pathianin a khawngaih a, chatuan thihna lak ata min tlan turin A Fapa Khawvelah a rawn tir a. A Fapa, Yeshua chu mi sualte aia khenbeh niin Ni thum leh zan thum thlana zalh a nih hnuin Sabbath tlaiah a tholeh a, min sawipui turin Pa ding lamah a thu ta a ni. A thihna leh thawhlehna ringtute chu thil \ha ti atan chhandam an ni.
Thurin V: Kohhran
Kohhran chu ringtu intel khawm, Pa Pathian YAHWEH Vana mi duhzawng titu, Pathian hunbi ruat vawngtu leh Yeshua Messia thu pawmtu a ni. Chanchin Tha puang chhuak tur leh mihringte rawngbawlsak tura ding a ni.
Thurin VI: Ringtu nun
Ringtu chu ngaihtuahnaah, thu-ah leh thiltihah te thianghlim tura koh a ni. Messia leh Pathian thu ang zela thil tha tih hi ringtu nun chu a ni.
Thurin VII: LALPA Inkhawmpui thianghlimte
Engkim chunga roreltu Pathian chuan a mite tan Chawlhkar Sabbath leh Inkhawmpui Thianghlimte hi a hunbi dik taka serh tura min pek a ni.
Thurin VIII: Baptisma
Baptisma hi Yeshua Messia hminga a thihna leh thawhlehna anpuia tuia hnim pila chan a ni. Yeshua thihna leh thawhlehna ringtu leh pawmtu chan tur a ni a, Baptisma hi nun hlui phumna leh nun thara nung tura thawhlehna a ni.
Thurin IX: Thupek Sawm
Pathianin a mite kaihhruai nan hmangaihna thupek a ruatte chu Thupek Sawmah hian a kim. Pathian thupek bawhchhiat hi sual a ni. Dante chu miin an zawm chuan Pathian leh mihring a hmangaihna chu a tilang a ni. Chu thupek chu danglam chungchuang bik tak leh Pathian kut zung ngeia ziak a ni. Thupek Sawm zinga a eng ber emaw pawh hi hmaih emaw, belhchhah emawa tihdanglam thiang a ni lo va, a zavaia zawm kim vek tur a ni.
Thurin X: Thihna leh Thawhlehna
Mi a thihin nunna thaw (neshama)-in a chhuahsan a, ani chu leilungah a kir leh a, chumi ni ngei chuan a ngaihtuahna te, hriatna leh nunna zung zam zawng zawng a tawp vek a ni. A taksa kaihthawhlehna ni tur a thlen hma loh chuan a muhil rih mai a ni.
Mi fel thi tawhte chu chatuan nunna chang turin kaihthawh an ni ang. Chu chu thawhlehna hmasa chu a ni. Yeshua Messia hova kum sangkhat rorel hnuah chuan mi suaksualte chu thih hnihnaa hrem turin rorelna hmachhawn tura kaihthawh an ni ve bawk ang.
Thurin XI: Hrilhlawkna
Pathian Lehkhabuah hian hrilhlawkna thu Pathianin a mite hnenah a hriattir a, chungte chu a hun takah a thleng thin a, Tin, hun ropui Lalpa lokal lehna leh kum sang rorel te, Pa chatuan Lalram lo thleng tur te min hriattirtu a ni. Pathian thu leh Pathian thawkkhuma pek a nih avangin ringtute chuan kan pawmin kan ring a ni.
Thurin XII: Hun hnuhnung thu
Yeshua lo kal lehna: Yeshua Messia ngei kha he leia a Lalram rawn din turin mit ngeia hmuh theih turin a rawn kir leh dawn. A chhoh dan ang chiah khan Van chhum zingah a rawn chhuk leh ang. A ruka mi thianghlim lawr tih hi Bible-ah a awm loh avangin keini chuan kan ring lo.
Kum sang Lalram: Yeshua lo kal leh hunah chuan he leiah hian a Lalram a din ang. Kum sang khat awh rorelna (reigning) chu a mi thianghlimte nena neih a ni ang. Chu chu engkim siam that hun leh siam tharna a ni ang.
Pa chatuan Lalram: Kum sang khat hnuah chuan Pa hnenah Lalram chu a hlan ang a, YAHWEH nen chatuanin kan cheng za tawh ang.