HMASÂWN KAN NGAIHNA PART – 3
Date: 19th May 2025
Pro Pastor Lalramdinmawia
Hmasâwn kan ngaihna - members te dinhmun ni fo – tun ṭuma kan ngaihtuah tur chu ‘Khùalkhuâa Kohhràn belh chungcháng’ hi a ni.
Zirna avang te, hnâ avang te leh ṭul hráng hráng avangin khawpuiah leh thingtlángah kan zin ṭhin a. Heti ang níkhua hian chawlhni (Sabbath) theihnghilh ta maia khawsak te, Kohhràn awmlohna khua ni àwm fahrana khawsak mai te; Kohhran Register-a hming chuanglo ni àwm taka Sabbath lo bawhchhiata, lo muthilhsan veng veng te hi khùalkhuáa zin ṭhin Kohhran member zîngah kan awm ta fo niin a lang.
1. ZIRLÂI: MIZORAM – A AWM TE
Zirna avangin khawpui zâwk (Aizawl, Lunglei, Lawngtlai leh adt.) ah Pathian Kohhran Ṭhalâi Pawl Members te chu kan inzâr pharh ve viau ta a. Thil lawmawm tak a ni. Chutih rual chuan, thil lawmawm loh tak chu Kohhran belh tum miah lo leh nacháng hre ṭhak lova Chawlhni (Sabbath) vui liam ta mai mai kan awm thin hi a ni awm e!
Zirlâi te chu a kum têl emaw a thla têl emawa khualkhuaá awm kan ni tlângpui a. Heti angah hian, Kohhran hi belh hrâm hrâm tur a ni. Biak In awmna hriat loh te, Kohhran mî hriat loh te chu thil awm thei a ni a. Mahse, kan tum phawt chuan, zawnchhuah dan a awm rengin a rinawm.
Ṭhenkhat chu, Sabbath serh lova Sunday -a lo inkhâwm tawk te; Sabbath serh miah lova, mahni nawmsak bàwl duh zawk mai te hi kan awm ang tih a hlauhawm khawp mai. Hemi chungchángah hian nu leh pate pawh kan pawimawh viau.
Sum leh pâia harsat tawh cháng te, dam ṭhatloh nî te hi thil awm thei a ni a; kan chungah a chhia a ṭha pawh thleng thei reng a ni. Hêngah hian kohhran bêl leh bèl lo chu a hriat theih fo. Tin, Sabbath hlàmchhiaha, inkhâwm mumal lova, kohhran zinga tèl loh fo hi Setana thlèmna kan hneh loh lian tak a ni.
Zirlâite zingah, vawi khat inkhâwm loh hian ahnu leh inkhâwm a tichákawm tawh lova; kan tîm a, kan zak a, chhuanlam kan siam chhunzawm fo ṭhin. Hei hi chin tam tawh loh a ṭha khawp ang.
Mikhual ni chunga Kohhran bél te rêng rêng, an làwina kohhranah a kila lung pawimawh tak – member entawntlâk an ni ziah. Hêng mi te hi entawn a pawimawh ang. Pathian ṭihna tello zirna hian rei a daih mai loh bakah chhàwr theih tawka hlawhtlìnna hi a phuru mawh khawp mai. Chuvangin, zirlái te, ṭan lak ṭheuh tum ila a ṭha hle ang.
MIZORAM PÂWNA AWM TE
Mizoram páwna awm - zirlâite leh hna nei te tan hian Sabbath serh hi kan awm chhan a zirin a buaithlâk cháng a awm fo awm e. Kût ní vàng thlà theihngilh mai te, Chawlhkâr Sabbath theihngilh tlat mai te hi thil awm thei a ni a, hêngah hian nu leh pa, u leh náu bakah kohhran chhûngkuaa ṭhianṭha ten kan laina hnai kohhran member hmun hláa awm te chawlhnite hi kan hrilh thar (remind) fo a pawimawh ang.
Sabbath ah inkhâwmna hmun tur te a awm loh chuan – Bible chhìarna ní atana hman te, ṭawngṭâina nî bik atana hman te leh kohhran members te biakna ni atana hman te hi a ṭha khawp mai. Kan theihtâwk leh hun kan neih dàn ang zela Pathian lam hawia hun kan hman hian Lalpan min pawmsak êm êm ang.
2. HNA ṬÛL DANG TE AVANGIN:
Hnà avangin emaw, Inentirin emaw, Chhûngte kanin emaw, dâwr bungrûa lain emaw, sawrkár pisa dâwrin emaw chawlhni cháma khualkhuaá kan awm hian kan ngaihtuahna hian thildang ni lovin Biak In lam ngei hawi mawlh rawh se.
Sabbath serh lova hna ṭul nia kan ngaih tih lâwp lâwp te hi a awm thei khawp mai. Héngah hian invèn thiam a pawimawhin, hun siamrem hrâm hrâm te hi chìn a ṭul ṭhin.
Thawmhnaw nei lo tia chhuanlam sìam thawr te hi chin tam loh a ṭha khawp mai. Khawpuia kan inthùamna te hi Pathian thu ngaihthlaknan zahpui tur a awm lo. Thingtlángah ngat phei chuan chhuanlam atan a tling lo lehzual awm e. Sabbath nî châma zin tur tih inhrelâwk te phei chuan Inkhawm tum sa-na nei chungin thawmhnâw te pawh kan keng mai tur a ni. Inchèina kawngah hian Kohhran chhungkûaah harsatna lian tham ala awm lo lai te hi ngaihtuah chhuah zawk hial tur a ni. A nihna takah chuan, kan nihna anga kan kal hian kan member -pui ten lawm takin min lo dawngsawng zawk tih hriat tur a ni.
ENGTIN NGE HMÂ KAN LAK ANG?
Kan tu leh fâ – hmun danga awm te hi Sabbath an serh ngei theihnana kan puih theihna te:
1. Nu leh pa ten Sabbath apiangin kan tu leh fate biak nise, inkhawm ngei tura hrilh tur a ni.
2. Kan fate leh kan tu te mikhùalna hmuna Pastor, Elders, Deacons te biain; inkhâwm tura sâwm chhuak turin ngen tur.
3. Tualchhûnga Deacons, Elders leh Evangelist te’n an enkawl - ṭhalâi member te zirna hmun an hriatpui beisei a ni a, chûng an beràm, hmun danga awmte chu an rawngbàwlpuite hnenah enzuia sawm chhuak turin hrilh ṭhin ni bawk se.
4. An mikhùalna hmuna kohhran members ten an hriat phawt chuan ngaihsakin sawm ṭhin se.
5. An inkhâwm vawikhat hmuhnaah, Kohhràn puipâ lamin an Mobile no. neih tum ngei ngei se.
6. Thlakhatah vawikhat tal, a bikin inkhawm thei chin (Private Hostel a awm/In luah leh adt.) chu Circle (Bial) vawngtuten tlawh thei hram se.
Khing khi kan tih theih chuan khualkhuáa Kohhran bel lova khawsa mai mai te hi engnge maw chenah kan pui thei ngei ang.
A tawp berah chuan, khawi hmunah pawh awm ila, Pathian Biakbûk pan nacháng hria ni ngawt lo – pan ṭhin mî nih tum ṭheuh tur a ni.
Ṭhenkhat tih dàn anga kan inkhâwmte bànsan lovin, infuih tawn zawk ang u; ní chu lo hnai telh telha in hriatin infuih tawn nasa lehzual sauh rawh u.
- Hebrai 10:25