HMASÂWN KAN NGAIHNA PART – 1

Date: 19th May 2025

Pro Pastor Lalramdinmawia

Kohhran hian tihphung, ze nghet, chìn ṭhan - dawklaka kan neih hi hmun tinah hmuh tur a awm niin a lang a; Kohhran hmasâwn zèl duhnaah chuan a ṭhalo lai, a zahawmlo lai leh thianghlim tawk lo lai apiang chu siamṭhat zel a ṭha awm e.

 

Tun ṭuma kan ngaihtuahho atana pawimawh ka tih chu, “Inkháwm hrûaitu tena Pathian Biak Inkhâwm kan kaihhrùai dàn” hi a ni.

 

Inkhawm kàihruaitu – Chairman hi Pathian biak Inkhâwmnaah hian hmun pawimawh tak a chang a, mawhphurhna pawimawh tak a ni ngei mai. Pathian be tura lo kal ten thlarau leh tihtak zeta Pathian an biak theihnana boruak síama, an mamawh châw an dàwn ngei theih nan inkhâwm boruak vàwn hi a pawimawh hle a ni. Chumi atana inkhâwm hrúaitu (Chairman) mawhphurhna pawimawh zual tawi tein lo zir dawn ila – Kohhran chhûnga Inkhâwm kaihrúai ṭhin te’n vawn ṭheuh tum ila, kawng khatin hmá kan sawn belh a ni ang.

 

1.      INBUATSAIHNA ṬHA:

Kohhran Inkhâwmna hi kawng tamtaka a zahawm loh fo chhan chu inkhâwm members kan tlèm ṭhin avanga Chairman te inbuatsaih ṭhat duhlohna hi a ni kan ti thei ang! A tam zawk hi chu ruat chawpchilh ang maiin kan kaihruai ṭhin niin a hriat fo.

 

Inkhâwm hruaitu chu a phak tâwkah a inbuatsaih ngei tur a ni. Pathian thu chhìar tur te, hla sakho tur te leh hun hman dan tur indawt fel tak ruahman lâwk a tum tur a ni. Hla thlàn tur zàwnchawp te, thawhlàwm hlantu tur kohchawp thut te hi chinloh tur a ni. Mahni In lamah ṭawngṭâina nen Pathian páwl chunga inbuatsaih lâwk vek chuan awmze nei takin inkhawm a hrûai theih ngei ka ring.

 

2.      INKHÂWM KAL TLÂI LOH:

Chairman nih leh inkhâwm kàl tlài hi thil inhmeh lo tak a ni. A theih chuan dâr rîk rualin Biak In thleng thei se a duhawm ber mai. Mipui ṭhùt ṭhup tawh hnua hrûaitu alo thlèn chauh chuan a zahawm lo a ni.

 

3.      INCHEINA:

Kan thurin leh Bible pawm dan ngaihtuah chuan Deacon (Rawngbâwltu) chin hi chu chhûngril thianghlìmna bâkah pâwnlam landànah pawh chimlím leh kulmûk tak, inchèinaah pawh inuluk ber àwm hi kan nia! Mahse, kohhran dang zawng aia inchéi uluk lo ber leh invàwn thianghlim peih lo ber kan ni ang tih a hlauhawm khawp mai. Neih tawka invàwn thianghlim hi kan intihhmuh a hun tawh awm e.

 

Inkhawm hruaitu chuan, a àwm leh mâwi tawkin inchei a thiam tur a ni. T – Shirt – kawr nghâwng nei emaw nei lo emaw hâk te, Cotton Jean hâk te, Chapal/Slipper bun te, kawr chuar lutuk hâk te hi a theih hram chuan Chairman fashion ah hmanloh a ṭha. Kan culture mitin a chen tâwk -  Kamis, Smart Pant, Smart Shoe nena inthuam hi a mawi rih ber awm e. Kawrchung (Coat) leh Nghâwng awrh (Necktie) te pawh a theih chuan a mawi viau. Biak Inchhûngah hian landàn hi a pawimawh tel tih hriat reng tur a ni.

 

4.      ṬAWNGKAM HMAN DAN:

Ṭawngkam zahawm leh dik hman tum hram a ṭha khawp mai. Pathian biak inkhâwm hruaitu chuan a hrùaina tláng aṭanga ṭawngkam hman àwm leh àwm lo chu a inbuatsaih pahin a thliar fel thiam tur a ni. Tin, a ṭawng ring tawk tur a ni a, muang lutuk lo, rang lutuk lo ni thei se a fuh viau.

 

5.      THUNAWI NEIH THU:

Hei hi kan hmasâwnna tur pawimawh ber te zing a mi a ni. Inkhâwm hrûaitu dinhmun hriatfiah hi ava pawimawh em. Thunawi ngah duah tur a ni lo; thu pùan lo tlip ve zen te, thuhrìl lo tuihnih ve ṭalh te, Pathian be tura kalkhâwmte nuihtir tuma fiamthu thawh hram te, inbàwlna ṭawngkam hman te hi a ṭul ber lo ang. Inkhâwm ban fel hnuah chûng chu a duh ṭalh chuan a ti thei a ni. Chanvo neitute koh dâwnah pawh mikhùal leh mi thar deuhte an nih loh chuan thunawi nei lova koh mai hi a felfai ber awm e.

 

6.      ṬAWNGṬÂI:

Chairman ṭawngṭâi dan hi a pawimawh leh viau. Hmun ṭhenkhatah hun ṭantu kan nei a, ṭhenkhatah kan nei lemlo thung. Hun ṭantu neihna bikah - Chairman in hun ṭantu a koh hmáa a ṭawngṭâina hi a ngaihtuah fim a pawimawh fo. Hun ṭantu chham tur zâwng zâwng a chham vek ṭhin te hi a ṭul lutuk awm love. Kan dinna tláng a zir zela ṭawngṭâi dan te thliar fel thiam hi a pawimawh.

 

Chiarman ṭawngṭâina hla chu mipuiin Pathian an pàwl theih nana buatsaihna lam hawi ni thei se a mawi ber awm e. Chairman tláng aṭanga veizâwng chham kùal duah te hi a fuh lem lo a ni. Ṭul dang leh pawimawh chu fianrial leh remcháng dangah te dil zawk a ṭha ang. Tin, thilpêk hlan danah pawh, ṭawngṭâia thilpek hlàn mai tur kan nih laiin kan chham kùal duahna lamah thilpêk ber hlàn lova dìlna ṭawngkam nena tawpna sìam daih te hi tih loh ṭhin nise a va mawi dawn em.

 

7.      MUTTHLÛK LOH:

Chairman chuan a hun a hrechiang anga, a hmá zânah mut ṭhat te tum thei se a fuh ang. Mutthlûk hi chìndawklaka neih chuan a theih viau awm e. Mahse, kaihrûaitu anih angin, mipui zawng zawng hmuh theihin a lang si a; inkhâwm chhungin a ṭhutna hmunah uluk takin ngaithla thei sela a zahawm ber ang. Thildang lo chhìarsan emaw, lo mutthlûksan daih te hi kan ching fo ṭhin a; patling tih atana thil mawi lo tak a nih avang pawn zahawm takin, mipui rilru la peng lo zawnga awm thiam tum tur a ni.

 

8.      BORÛAK VAWN:

Inkhâwm bul ṭan aṭanga a tawp thlengin Pathian biakna inkhâwm borûak a vawng tur a ni a, bengchheng leh boruak dang awm tur pawh ven thiam a ṭha.

 

Hêngte hi kan inzir a, kan tih chhin ve a pawimawh dawn a ni. Mahni thiam dan leh kalpui dan dah chungnùn ber pawh a fuh loh chang a awm ṭhin a, Pathian biak inkhawm hruaitu chuan a hruai leh hunah heti ang boruak hi siam thiam se a ṭha khawp ang.

           

Pathian chu Thlarau a ni; a chibai buktuten thlarau leh tih tak zetin chibai an buk tur a ni,”

Johana 4:24

 

A tawp berah chuan unaute u, a dik apiang te, a zahawm apiang te, a fel apiang te, a thianghlim apiang te, a duhawm apiang te, a thangmawi apiangte – thatna reng a awm a, fakna reng a awm phawt chuan – chung chu ngaihtuah rawh u.

Philipi 4:8