HMASÂWN KAN NGAIHNA PART – 2
Date: 19th May 2025
Pro Pastor Lalramdinmawia
A hmasa lamah khan Worship Service Chairmanship qualities kan târlang tawh a, tun ṭuma ngaihtuah tlàn atana ṭha tura ka ngaih chu ‘Sabbath Sikul Lesson kan inzirtîr dàn’ hi a ni.
Kohhran dangte hian an Sunday Sikul hi Inkhâwm pangai an neih ṭhin aiin an ngáipawimawh zawk deuh vek a, ngaihtuahna pawh zirlâibu-ah leh zirtîr danah an sêng nasa reng a ni. Kohhran ṭhenkhat sawi danah phei chuan, “Ringtu puitlìnna tur atan hian Inkhâwm service pángai, Gospel Camping leh hunbîk thil dangte aia pawimawh zawk chu Sunday Sikul kal hi a ni” an ti hial. Chuti ang chuan an kàl chhan leh neih chhanah an chiang a, zirtirtute chu Training pek thlap an ni a; ‘Sunday Sikul Nî’ an nei hial a ni. Hêngte hi ‘I entawn ve ang u, an tihdan i lachhawng (copy) ve ang u’ tih lam sawi ka tum lova, zirláite leh zirtîrtutena kan hlâwk tlàn ber nana zìrho dan tur ziah chhuah kan tum mai chauh dawn a ni.
Sabbath Sikul hi Kohhràn member sawhnghehna hmun, Kohhran inpumkhatna, zirtírna diklo laka min vêngtu, thlarau nun chàwmna hmun, ringtute chàwm puitlìnna leh thu tak hriatna hun ṭhà a ni tih hi hai phal miah loh tur a ni a. Chumi phawrh chhuak zo thei tur chuan zirlàibu a pawimawh ber ngei ang a, chuti ang zelin, zirtirtú zirtîr danah a innghat thui viau bawk ang.
Heti ang hian i’n sawi dawn teh ang:
1. ENLÂWK DAN DUH FÎR:
Sabbath Sikul zirlái enlâwk hi zirtirtu tan chuan sàwi lova lùm a ni. Zirtîrtu chu Pulpit rawngbàwlna nei thei chin emaw, mahni khuá - Kohhran chhúnga Pathian thusawi thei leh members te aia rawn tlák zawk emaw an nih a rinawm a. Zirtirtua ruat kan ni ta sa sa – ‘Zirtirtu Ṭha’ nih tum ngei tur a ni.
‘Zirlâi enlâwk’ han tih hian zirláibu leh Bible ngawr ngawr bih kha a kawk lova; a hnu leha zìr zawngchhang châkawm khawpa members te siam thei turin mite aia nasá leh uluk zawka kan inbih tam a pawimawh fo a ni.
Bible Hrilhfiahna (Commentaries) te leh Zirlái-bu thupui mil - lehkhabu dang chhiar tel te, thupui a zir te pawh a ni ang - ràwn awm zawk an awm chuan ràwn lâwp lâwp mai te zak lo ila. Chu chuan, kan ṭhahnemngaihna a tilang anga, kan zirlâi chhung thu a ti hausàin, kan hlawkpui ngei ngei dawn a; enlâwk kan duh dan hi hei aia fìr leh ṭha hian tum ṭheuh ang u.
2. HUN VAWN THIAM:
‘Hun vàwn dik hian mi a ti zahawm a ni’ tih hi hre hmasa phawt teh ang. Kohhran members te tlakchham lian tak chu Kohhran Activities – a hun vàwn (time management) kan thiam tawk lo fo hi a ni! Kár khata inkhawm vawi thum nei thei hi Church of God (Seventh Day) - ah hian kan tam rih lo viau mai thei. Hmun tam zawkah chuan vawi khat chauh inkhawm kan ni awm e. Hêngte avang hian kan inkhâwm chhunah duhthawh a ná a, a sual hran lo. Chutih rual chuan programme kan neih dan a zir zela hun vawn thiam hi a ṭul khawp mai.
Khaw ṭhenkhatah Inkhâwm pángai zawh tawh hnua Sabbath Sikul kal kan awm laiin, hmun ṭhenkhatah Inkhâwm pángai ṭan hmain (Chawhmáah) Sabbath Sikul kan nei ṭhin bawk a. Engpawh chu nise, Kohhran remchàn dan anih chuan a ṭha ve ve mai.
Sabbath Sikul zirlai phêk zât te, kan thupui thlàn te, kan zir ṭhin Pathian thu te hi ngaihtuah chian chuan darkâr chanve a khunglen theih vek a ni awm e. Chumi ti thei tur chuan a chunga kan sawi tak – enlâwk - inbuatsaihṭha a pawimawh reng a ni. Kan tuizawng emaw, sawifiah nuam kan tih zawng emaw anih avanga tlak duaha, sawi kual duah hi inzirtirna ṭha ber a nih loh cháng a tam zawk!
A bîkin, tár chak tawh lo – kan pi leh pute bâkah, rual û zawk te taksa hrisèlna chen hre kar chunga zirtîr-thiam hi a pawimawh. Ṭhalâite, Kohhrana an tui loh chhan tamtak te pawh hi hun vàwn dan kawnga kan pachhiat vang pakhat a ni tih hi hai phal loh tur!
Sabbath Sikula kan zirlâite hi a ṭha vek a, chumi ṭhatna pe chhuak tura ngáithlatute rilru hmin theihna kawng khat chu ‘hun rei tak hman loh’ hi a ni. Darkar khat te, a aia rei zawk hun hman te hi a fuh zan tawh lo ti ila kan sawisual tam lovang.
Chuvang chuan, Sabbath Sikul zirlai te hi darkar chanve chhungin khung len hi tum ta ila, kan hlawkpui loh phah miah lo hian a rinawm.
3. ZIRLÂIBU-A INNGHAT VEK LOVIN:
Inbuatsaihna a ṭhat chuan Zirlâibu emaw Bible chhîar emaw hi en chawt lova tih dan a awm ngei ang. Chhiar thlâk zawh vek hnua zirtír leh tè tè te hian hun a heh bakah ngáithlatute beng a tivir lem lova. Chuvang chuan, a bu chhung thu ang diak diaka zirtîr mai lovin, a pawimawh lai, hriat mâkmawh, sawi ngéi ngéi ngâi tih loh chin chu kùrpuiloh a sual lovang.
Zirtir-dàn bik a awm chuang lova. Duhthusàmah chuan, kan zirlâi aṭanga pawimawh kan tih kha thupui tê (sub point) siamin la chhuak ngauh ngauh ila, chumi rinchhan chuan, kan inenlâwkna leh kan hriat tawh sa aṭangin zirtir ṭhin mai ila a fuh ber. A bû en lova zirtîrna ṭha pe chhuak thei, zirlâi chhûng bâka zirlâi pâwn sàwibelh thiam, sermon lova zirtîr (teach) thiam tura ṭan kan lâk a pawimawh tihna anih chu. A pawimawh ber chu, zirtir thìam tumna rilru thianghlim pu chunga insìamṭhat ngai lai kan neihte insiamṭhat hi a ni mai awm e.
4. ṬAWNGṬAI TAIMAK:
“Mahni thu hril kan ni si lova”, Hei vàng hian min tirtu LALPA kan dawr fo a ngai a ni. Engpawh ti dawn ila, thil tè tham anga kan ngaihah pawh ṭawngṭai hi inthlahdahloh a pawimawh khawp mai. Sabbath Sikul zirlai lâ (zirtír) tur te’n ṭha taka an zirchhuahpui ngei theihnan Pathian an dawr zel tur a ni. Chu chuan anmahniah hna a thawhsak thei ang.
Kohhran hmâa thusàwite, zirtîrna pêk te hi tihṭhan tawh thil emaw tih zìn tawh thil emaw aniha, zàmna chhete mah kan neih tawh loh ngat phei chuan ṭawngṭâina tel miah lova han kalpui lâwp lâwp te hi thil awm thei a ni a; hei hi chin loh a ṭha khawp mai – rawng kan bàwlsak Lalpa hian a berâmte chawm tura min koh ang takin a ṭha ber hlui zel kan tum tur a ni ang.
Zirtir thiam tam tak kan awm tih hi kan hai miah lova, chutih rual chuan, rualkhâi taka thiam tlàn a pawimawh kan tih avangin heti hian kan ziak ta duah a ni. Chuvangin, khing khi ngunthlûk takin ngaihtuah tláng ila; kan zirtîr leh hunah kan sawi tâk pali te hi tih chhin tumin ṭan la zual sauh sauh ila – Kohhranin kawng khatin hma kan sawn leh a ni ang.