Sermons
YESHUA MESSIA TIHPHUNG (Thilmak tih chungchangah)
Pro Pastor Lalramdinmawia Natna nei, Yeshuan a tihdam zingah khan khawsik te, zeng te, kebài te, phâr te, ramhuai man te an awm nual mai a. Chanchin Ṭha bu liah pawh hmun pawimawh tak a luah pha a ni. Marka hian vawi 18 lai a sawi a, Luka'n vawi 21, Matthaia phei chuan vawi 20 ngawt a sawi a ni. Johana hian vawi 7 a sawi bawk a ni. Chanchin Ṭha ziaktute hian ṭangkái leh pawimawha an hriat avangin an ziaka ni ngei ang. Lal Yeshua khan natna khirhkhàn tak tak bakah mihring taksaa na siamtu réng réng tihdam a huam tlat lai hi a mak khawp mai. (Mk. 1: 32-34). A tihdam, natna te réng réng hi vawilehkhata tihdam chu a awlái lo ṭheuh a ni. Ramhuai man phei chu a lár hle a, tihdam harsa tak a ni tih pawh Mk. 9:27-28 ah kan hmu a, zirtirte khan an hnawt chhuak thei lo hial a ni. Zeng tihdam phei hi chu zawi zawia tihdam ni lova, chawpchilha dama, hna thawk thei nghál mai tur chuan mi narân tih chi a ni lo bawk. Mahse, Yeshua erawh chuan a tidam nghal hmiah zél anih thung kha! Lal Yeshua hian thil mak tih chhan a nei zel ṭhin a, damlo a tihdam chhan chu Mt. 14:14 ah khan kan hmu a, “Tichuan, ani chu vaukama a chhuah chuan mipui nasa tak a hmu a, a khawngaih ém ém a, an damlote a tidam a,” tih a ni. A khawngaih avângin damlo a tidam a ni. Phâr a tihdam pawh kha a khawngaih vang a ni a (Mk. 1:41). Mitdel pahnih a tihdam pawh a khawngaih vang a ni leh a (Mt. 20:34). Mipui sángnga a hrai ṭum pawhin a tih chhan ber chu a khawngaih vàng bawk a ni (Mk. 8:1,2). Nain khaw hmeithai fapa thi tawh Yeshuan a kaihthawh khan a khawngaih vàng a ni leh (Lk. 7:13). Khawngaihna chu kuangkuahtir mai lovin thiltih mak nén Yesuan mite a tidam ṭhin a ni. Khawngaihna avanga damna chang an nih rual hian, Pathian ropùi lanna tur zawka a tihdam pawh an awm ngei mai. Hêng tihdamna phena thil pawimawh em em awm leh chu, Yeshuan thil mak a tih dawn apiang hian a dawngtu tur lam an pawimawh hle ṭhin niin a lang. Rinna neite hnénah a ti ber a ni tih chu Mk. 6:5-ah amah an rin loh avangin thil mak a ti thei vak lovin a lang. ‘I rinna hi i dampui a ni e’ tih te, ‘Hlau suh la, ring mai rawh’ tih te, ‘Miin rinna a neih phawt chuan a tan tih theih loh réng a awm lo vang’ tih thute hian thiltih mak leh rinna hi a inkawp tlat a ni tih a tilang. Tin, Yeshua thiltih mak chungchanga thil dang lo lang pakhat chu ‘ṭawngṭai’ a ni. Dil chuan engkim pék a nih tur thu Yeshuan a sawi a. Ramhuai man, Yeshua zirtirten hnawh chhuah an tuma an theih lohva a chhan flanrialah an zawha Yeshua chhànna chu, ‘Hetiang hi tawngṭai chauh lo chuan engtin mah a chhuak thei lo’ tih a ni (Mk. 9:29). Mihring ṭhahnemngaihna leh remhriatna rinchhan lovin ṭawngṭaina hmangin Pathian thiltihtheihna a chét a ngai a ni. Rinna leh ṭawngṭaina a ṭangkài ang bawkin a tak tak thleng tur chuan ‘Pathian kutzung’ a chét a ngai a ni. Kan taksa damna tur te, kan rilru damna tur te, kan thlarau damna tur tein Pathianin A Kohhran chhungkuaah hna thawk chhunzawm zel se, chuti'n Amah fak kan thlahlel zual zel dawn a ni.
19th May 2025Read More
SIM RAWH U, VAN RAM CHU A HNAI TAWH E
LUKA 13:3 Pastor HC. Zosanga Nangni pawh insim loh chuan chutiang bawkin in boral vek ang. Ringtute nunah hian sim tur a tam hle mai a, IKorinth 6:9-10 kan chhiar chuan, “A nih leh mi fel lote chuan Pathian ram anluah lo vang tihin hre lo em ni le? Bumin awm suh, inngaih hmangte emaw, uirete emaw, mi hurte emaw, mawngkawhurte emaw, ruk hmangte emaw, mi duhamte emaw, zu ruih hmangte emaw, mi hau hmangte emaw, hleprute emawin Pathian ram anluah lo vang.” Mihringte hian chatuan thilte leh a thlarau tana rorelna lo thleng turte hi a ngaihtuah peih loh zawng tak a ni a, chawp leh chilha a thil tha lo tih ten a vuak let lai ngei pawhin sim a tum chuang lo. A tihsual hnuhnun ber chu eng emaw chen insûmin han chawlhsan ve bawk \hin mah se, thlêmna a lo then leh rualin a châknaa hruai bovin a awm leh mai thin, ti tawh lo turin a intiam a, a thutiam chu a bawhchhhe zui leh a, a tiam leh a, a bawhchhe chawp leh chilh a, chutiang chuan a kual a kual a, hei hi Pathian pawikhawihna leh a mah hmuhsitna a ni. Simna hi engvanga pawimawh nge a nih i lo sawi teh ang. Hei hi Pathian lehkha thuah ngei pawh chiang takin kan hmu a, Pathian lam hawi duh lo leh sim duh lote chu an sualnaah chuan an thi ang a, thisen mawh chu an mahni lu chung ngeiah chuan a awm ang. Mi zawng zawngin thil kan tisual tawh avangin Pathian chuan sual leh bawlhlawh chhete pawh a hnena awmah a duh lova, a pawm theih loh avangin, sim hi tih mâk mawh a ni. Simna hi thinlung thlak thlengna leh nun danglamna a ni a, chumi hma chuan Pathian nen a chen dun theih loh, sual leh Pathian i hmangaih kawp thei lo va, Pathian leh sum rawng i bawl kawp thei hek lo. Mi bawlhhlawhte reng reng Pathian hmaah an ding thei lova, tuna i nih dan ngai ngai khan van ramah luhtir ta che sela, van ram chu i tan hremhmun ang tho a ni ang, van angelho zai rite chu i tan a bengchheng lutuk ang a, hrehawm i ti lutuk ang. Chuvangin tuna i nihphung kha thlak phawt a ngai a ni. Pathian mi i nih a ngai a ni. Chuti lo chuan chatuanin in leng dun thei lovang. Pathian rawngbawl hi hrehawm i tih zawng a niha Dakar khat inkhawm pawh i peih loh chuan engtin nge a mah faka Lal thutthleng hmaah leh Beramno hmaah chatuana zai chu i peih teh lul ang, rei i ti lutuk ang a, i tuar zo tawp lo vang. Chu hmun ropuia lengte chuan chu chu an hna ber tur a ni a, sual reng reng aawm lohna sual hawisana amah pan duh lote reng reng an luh lohna hmuna lut tur chuan sim chu tih makmawh a ni, Chuvang chuan sim la, hawikir leh rawh. Engtizia nge ni, sual ngaihdamna chang hauh si lova, engthawl tak leh ngaih tha taka ila awm theih chu le! Pathian thu chu a daw ngai lo va, khatia suala i thi a nih ngat chuan khawngaihna kawng hi chatuan atan an khar hnan dawn che a, chatuana zual zel tur hremna rapthlak tak chu i chang ngei dawn. I hlimna thlakhlelte hi eng ang chiah nge maw a nih chu le? Rei lo teah an ral a, engmah lovah an chang leh thin, rei lote atan mai a ni. Châkna tizual tawk lek duh tawk ngah tih awm si lo, nun tuihal tizualtu thinlung tikhauha Lalpa min hnaihtir thei lotu atan zawng a nep em mai. He khawvelah ngei pawh min tichhetu mai an ni a, sim loh phei chuan khawvel thar lo la awm tura chhiatna rapthlak thlentu tur anni leh nghal. Setana hna an thawk tih an hre si lo, Setana hnathawktu chuan Setana hen atangin a thawh hlawh a la tel dawn si a, chu chu chatuan thihna leh thiamloh chantirna chu a ni. Chuti lamah chuan i âtna leh i sualna te, i chan chauhzia te, i chungpik ziate chu aw chhang bur khawpin i la tahpui ang a; mahse, tuman an bengkhawn tawh lo vang che u, tuna chhandamtu ngilnei hi roreltu khauh takah a la tang dawn si a, Pathian chuan mi zawng zawng tan khawngaihna hun a pe a, simna hun leh insiam thatna hun a pe a, chu hun pek hawisana ngaineptute chu chhandam an ni dawn lo. Chuvangin sual lam kawnga la kal zelte hnenah hei hi ka sawi duh a ni, i hun hlu tak chu hmang tha duh lovin i thlarau nunna chu a ngainep ngam chiah maw? Khawvel hlimna leh lâwmna i zawn leh i chen mekte hian nakina i chan tur chu ei rala, chatuan hlimna leh lâwmna chu Setana hnenah i hlân a, chatuanin lungngaiin i la rûm dâwn. Tun hi khawngaihna hun a ni a, i sualte i sim theihna turin Pathianin a rawngbawltute a pe che a, mahse, ngaithla duh lovin hlimhlawp i la bawlsan fova, nakin lawkah chuan an awm tawh lo vang, chutih hunah chuan he hun tha hi mit khap kar pawh hmuh leh tumin khawvel leh a hausakna lêt sang sawm pawh hi pe dâwn mah la, i hmu leh tawh ngai lo vang, khawngaihna leh zahngaihna ni hi a liam tawh ang a, Lal Yeshua thisen tuna i kephah hnuaia i rahbeh far khat pawh i au far tawh lo vang. Messia leh a zahngaihna ni hi vawi khat tal hmuh leh châkin i la tap dawn a ni. Nimahsela, i tap thlâwn ang, Pathian chuan tunah hian hun tha a pe che a, a pe leh tawh lo mai thei che a ni. Pathianin hun a tih hi, hun i tih loh chuan i hun tih chu hun lo a la ti ve dâwn a ni. Chutih hunah erawh chuan i chan chu a va râpthlak dawn em! Ni tha lo lo thleng tur chu pumpelh turin i sualnate kha zep rûk i lo tum palh ang e, rorelna niah chuan engkim an hmu chhuak vek dâwn, chumi niah chuan i thil zêp ruk leh sual thuhruk zawng zawng chu engah an la chhuak vek ang a, i sualna zawng zawngte a mi thianghlim zawng zawngte hriata an tar chhuah hunah chuan hremhmun lam panin an hruai tawh dawn che a ni. Chutih hunah chuan a chhun a zana nghaisakin i awm tawh ang, chawlh lawk aawm lo vanga, tawp chin a awm hek lo vang. Eng ang fakaua âtnain nge i thinlung hi luaha sualna hi i hlauh loh fo chu le, Nebukadnezzara meipui pumpelh tur chuan Kaldai mite chuan engpawh an ti hreh lo asin, Pathian thinurna meipui pumpelh tur hian engmah i ti lo vanga maw! Han ngaihtuah nawn leh teh, i sualna ten awmzia kha i sualnain a tihbuai thinzia che leh Pathianin simna hun tha a pek lai che a, i pawisak loh thinzia te kha, inchhirin Pathian chu ngen ngawl takin au rawh, tichuan i thinlung lung anga sak kha tihnemsak tur chein dil la, i thinlung lung anga sak kha a la bo ang a, thinlung tisa anga nem a pe ang che. Hlimhlawpna leh sual nawmna zawng zawngte chu kalsan phalin i nun hlui zawng zawngte mausama hnuchhawn turin inbuatsaih la, i hun lo la awm tur zawng zawnga Pathian felna leh thianghlimna thlazar hnuaia a rawngbawl turin inpe ang che. I nunhlui dawn kira inchhira tah ringawt kha sual i kalsan chuan si loh chuan engmah a sâwt lo vang, thlemna dodal tur leh sual kawng kalsan tura duhna nei si lovin, sual kawng zawh reng chung chuan Messia hi i sual ngaidam turin beisei suh. Amaherawhchu, sual kalsan duhna neia Lalpa hnen i pan phawt chuan a ngaihdamna thutiam ropui tak chu a la awm reng a, i hnung tawlhnate chu a lo ti damin hmangaihnain a lo lawm dawn che a ni. Sualna chu chatuan atan hnuchhawn turin tun atang hian inbuatsaih la, Messia chu thlanga Diabola leh a hnathawhte chu Lalpa tana dotura inpein a kulhpui nghet takte thiahsak a, Messian “Ngai teh, kawngkhar bula dingin ka kik hi, tupawhin ka aw hriaa kawng mi hawn chuan a hnenah ka lût ang a, a hnenah zanriah ka ei bawk ang,” a ti. Aw le, nangmahah khan Messia chu lo luh a duh a, i thinlung kawngkhar kha a kiksak reng che a, hawn rawh le, tichuan a lo lut ang a, nangmahah aawm reng tawh ang. Nangpawh a mahah i awm reng tawh ang. Nangni pawh insim loh chuan inboral vek ang. Sim rawh u, Van lalram chu a hnai tawh e. Chhiartute Lalpan malsawm rawh se, Amen.
10th Apr 2025Read More